Kralendijk- Gobièrno di Boneiru ta kere ku lo ta interesante pa atraé e asina yamá ‘Super Yachts’ na Boneiru, u sea yatenan hopi grandi.

Esaki ta un parti di turismo ku por generá basta entrada adishonal, ya ku en general ta hendenan hopi pudiente ta bishitá isla ku yatenan grandi. Gobièrnu ta remarká sinembargo, ku aktualmente Boneiru no tin muchu fasilidat pa sirbe a yatenan grandi aki.

Aktualmente nan ta mara na un di e pirnan prinsipal den bahia di Kralendijk, pero esaki no ta un situashon optimal.

Estadia

Loke ta hasi e segmento di merkado aki interesante ku hopi biaha e yatenan aki ta keda vários dia, siman òf asta luna na e islanan ku nan ta bishitá. Durante nan estadia e pasaheronan na bordo en general ta gasta basta plaka.