Kralendijk- Gobièrnu a yama un konferensia di prensa pa por duna splikashon tokante e situashon na rotònde riba Kaya Amsterdam. E trabounan a para mas ku 4 luna pasá, supuestamente pa motibu ku e rotòndo no ta bon konstruí.

Te asina leu, gobièrnu no a duna masha splikashon tokante e situashon i/o e problema ku a surgi. E siman aki, miembro di Konseho Insular, Daisy Coffie a manda un karta skèrpi pa Konseho Ehekutivo pa eksigi un splikashon kiko eksaktamente ta pasando.

Segun Coffie, e situashon ta un falta di rèspèt pa outomobilistanan ku ya pa lunas kaba tin ku pasa riba un kaminda di tera pa pasa e krusada.

Durante e konferensia di prensa, diputado James Kroon i Roy Martina, direktor di Direktorado Desaroyo i Espasio lo hiba palabra.