Kralendijk- Ta basta un par di kompania di aviashon lokal a sirbi Boneiru den transkurso di tempu, for di dia ku a habri e promé aeropuerto di Boneiru, den e tempunan ei ainda na Subi Blanku.

E promé aerolínea ku a kuminsá bula Boneiru tabata KLM, sigui pa Antilliaanse Luchtvaartmaatschappij (ALM), den kual KLM den komienso tambe a hunga un ròl importante. ALM ta esun tambe ku a sirbi Boneiru pa mas tantu aña tras di otro. ALM, pa un tempu relativamente kòrtiku, tambe a usa un kompania subsidiario, ABC Commuter, pa sirbi e ruta pa Boneiru ku avion Twinotter.

Despues di ALM a sigui tambe Air Aruba, Avia Air (Aruba), BonairExcel, ku despues a sigui entre otro komo BonairExpress, Dutch Antilles Express (DAE), Divi Divi Air, Dutch Caribbean Airlines (DCA) EZ Air, Insel Air, Tiara Air i Aruba Airlines.

Tin algun aerolinea chikitu mas ku a bula, aunke sea pa un tempu kòrtiku pa Boneiru, pero niun no a sirbi e isla manera esnan menshoná promé.

Stabil

Esun ku a sòru último añanan pa e servisio mas stabil entre primeramente Kòrsou i Boneiru ta Divi Divi Air, siguí pa EZ Air. Ámbos tin masomenos 20 aña ta sirbiendo e isla. Divi Divi Air, den tempu di Hans Barth, a kuminsá ku un Cesnsa 402B di apenas 7 pasahero i despues a bini ku e Britten Norman Islander, ku por karga 9 pasahero. Den último añanan Divi Divi ta hasi mas i mas uso di nan avionan ‘Twinotter’ ku por karga 19 pasahero.

EZ Air a kuminsá ku dos avion Britten Norman Islander, pero despues a introdusí na aña 2018 e avionan Beechcraft 1900D ku te ainda e ta usando riba mayoria di su rutanan. Nan por karga 18 pasahero. Dentro di algun siman lo yega avionnan mas grandi pa EZ Air, e asina yamá Saab340 ku por karga 34 pasahero.