ORANJESTAD – Aruba Airport Authority N.V. (AAA), ta kla pa bai kuminsá ku su proyekto grandi di rekonstrukshon “Gateway 2030” diseñá pa yuda ku e limitashonnan den kapasidat, e eksperensia di pasahero i e sostenibilidat ku Aeropuerto Internacional Reina Beatrix (Aeropuerto di Aruba) tin aktualmente. Segun e aeropuerto ta bisa, COVID a fòrsa nan pa pensa di nobo riba e forma di ehekushon di e proyekto ambisioso aki na komienso di aña 2020.

Maneho di AAA, bou di supervishon di e Hunta di Supervishon, a disidí di kontinuá ku e ehekushon i invershon pa ku e proyekto.

E proyekto lo wòrdu ehekutá den vários fase. E Fase 1A di Gateway lo konsistí di:

1. E konstrukshon di un fasilidat di maleta nobo.
2. E implementashon di un sistema pa maneho di maleta nobo.
3. E ekspanshon di e “check in hall” Merikano i
4. Konekshonnan nesesario riba “airside” y “landside”.

Lokal

Pa duna apoyo na e ekonomia di Aruba di e mihó forma a keda disidí ku lo ehekutá e fase aki 100% lokalmente. Esaki ta nifiká ku 5 kontratista Arubiano konhuntamente lo ehekutá e promé fase di Gateway 2030. E grupo aki ta konsistí di Albo Aruba NV, Bohama Aruba NV, Arubaanse Wegenbouw Maatschappij (AWM), Croon Caribeiy CHS Technical Contracting and Trading Company N.V. E kompanianan lo traha huntu bou di e nòmber “ABC Project Venture”.

“Gateway 2030 Fase 1A lo hasi uso di e último den teknologia i inovashon pa na final benefisiá nos pasaheronan, hasiendo nan eksperensia mas lihé i sin kausa strès. E uso di ekipo biométriko i “self-service” den e check-in hall, akompañá ku e mihó sistema di “baggage handling” lo brinda un efisiensia signifikante na e operashon di aeropuerto, mientras ku ta mantené su mes na e nivelnan mas haltu di safety, seguridat i sostenibilidat,” asina Shensly Tromp, AAA su Director di Desaroyo i Teknologia a komentá.

Mihó

Na tur, e proyekto ta nifiká un invershon di masomenos 140 mion dòler merikano. “No obstante e diferente retonan, e proyekto aki lo kontinuá i Aruba lo tin un di e mihó aeropuertonan den e region,” segun Aruba su Minister di Turismo Dangui Oduber a bisa.

Segun e planning di Fase 1A di Gateway 2030, lo kuminsá ku e proyekto na yüni di 2021. E promé logro lo wòrdu alkansá na febrüari 2023, ora e edifisio di e departamentu di maleta lo keda kla. E di dos logro lo wòrdu alkansá na oùgùstùs di e mesun aña (2023) ora e check-in hall keda kla i e trabounan sivil tambe keda finalisá. Fase 1A kompleto lo wòrdu entregá door di ABC Project Venture na yüli 2024.