Kralendijk- Gezaghèber Edison Rijna djaweps mainta a anunsiá un suavisashon basta konsiderabel di e medidanan kontra di Covid-19.

Danki na un bahada basta drástiko di kasonan aktivo te na 34, hopi kos ta posibel atrobe. E nivel di riesgo ta bai na nivel 4. Ku esaki restorant i pakusnan no-esensial por habri atrobe, aunke ku sierto prekaushon. Asina tambe ta kita lei seku i toke di keda. Kasino ku gym tambe tin mag di habri atrobe.

Agradesido

Rijna a bisa den su konferensia di prensa ku e ta kontentu i gradesido ku koperashon di e poblashon. Esaki no solamente dor di tenementu na regla, pero tambe e echo ku hopi hende a bai bakuná. Segun Rijna, esaki tambe ta yuda prevení ku kos ta sali ta sali for di man atrobe. Gobièrnu tin speransa ku e kantidat di kaso lo sigui baha na Boneiru.