KRALENDIJK – Na Lac, banda di Sorobon, a mira último dianan un kaiman. Director interino di Stinapa, Sjon van Essen, ta indiká ku for di e dia ei ta buskando e animal intensívamente pa kaptur’é seif i hib’é un otro sitio. Tambe e ta pensa ku si no kapturá e kaiman mas promé, ku Sorobon lo keda será en todo kaso te djaluna.

“Nos ta kordiná e buskedaku koutela. Mainta nos ta usando drone pa skrudiñá e área di 800 hèktar i entre 5’or di atardi i 8’or di anochi nos ta buska ku flèshlait,” Van Essen ta konta. “Nos ke buska bon den e área, apesar di e situashonan fèrfelu den e palunan di mangel. E ta un reto pa motibu di e tereno kompletamente tapá, pero nos ta keda traha efisiente.”

Van Essen ta splika ku ta usa diferente téknikanan pa lokalisá e animal. “Nos a buta kameranan na sitionan stratégiko i ta usa as pa influensiá e komportashon di e kaiman. Ta importante pa nos a saminá henter e área kompletamente e fin di siman aki.”

Difísil pa buska 

A mira e animal solamente un biaha, pero e tim di Stinapa ta tuma e situashon hopi na serio. “Nos a haña un opservashon konkreto i a aktua mesora riba esei. E ta fèrfelu, pasobra un kaiman por keda te un ora bou di awa, ku solamente su burakunan di nanishi visibel. Spesialmente durante anochi nos ta patruyá ku boto, pasobra esei ta e tempu ku e por ta aktivo.”

E tim ta trahando minusiosamente segun un plan ku a traha. “Ayera nos a pasa dor di e instrukshonnan ainda. A instruí tur hende klaramente i nos ta traha stap pa stap. Loke ta importante ta ku a sera e área, di moda ku nos hendenan por traha sin ku ta stroba nan. Esaki ta duna e mihó resultado. P’esei nos ta pidi tur hende pa respetá nos trabou.”

Tokante e as ku a usa Van Essen ta bisa: “Nos ta konsiderando ainda si nos ta usa galiña òf kabritu komo as, pero tin ku disidí esei ainda definitivamente.”

Siguridat na promé lugá 

Van Essen ta enfatisá ku siguridat di e poblashon lokal ta na promé lugá. “Nos ta keda buska aktivo i ta tuma nos responsabilidat na serio. Ta un operashon tenso i ku ta rekerí hopi energia, pero e siguridat di e empleadonan di Stinapa i e habitantenan di Boneiru ta semper na promé lugá.”

Hiba kaiman su habitat natural 

E meta finalmente ta pa kapturá e kaiman seif i hib’é bèk su habitat natural. “Nos ke transport’é pa un área kaminda e ta pertenesé, di manera ku e no ta forma peliger pa e poblashon lokal. Finalmente ta Entidat Públiko di Boneiru mester disidí despues kiko ta sosodé ku e animal.”

E área rondó di Lac ta keda temporalmente será pa públiko te na momento ku a kapturá e animal. “Nos ta spera ku nos por habri e área pronto bèk atrobe. Pero si esei no logra, Sorobon i Lac lo keda será en todo kaso te probablemente djaluna. Despues nos mester bai evaluá ku Entidat Públiko di Boneiru kua ta e partinan ku por habri atrobe. Pero e siguridat di tur hende ta na promé lugá,” Van Essen ta disidí.