ORANJESTAD- Resientemente investigadónan di Florida Atlantic University y University of California a deskubrí un tipo di kokolishi nobo, ‘kokolishi kono’ dilanti kosta di Aruba. 

E tipo di kokolishi ku ta biba den e laman no-hundu na Malmok, ta un di e 180 tipo di animal den kokolishi ku ta haña na Aruba. Segun Dutch Caribbean Nature Alliance, esaki ke men ku por mira Aruba komo un asina yamá  “hotspot evolushonario”.

Cocolishi kono ta kokolishi predatorio ku un kaska di diferente koló. E ta usa un djente hòl yen di veneno pa paralisá su proinan. Te ku resien tabata asumi ku tur sorto di kokolisho kono tabata pertensá na e mesun tipo, pero awor ta bin realisá ku ta trata di vários sorto.