KRALENDIJK – Djadumingu anochi 6 di òktober a detené un hòmber di 44 aña riba Kaya Grandi, pasobra e tabata tras di stür bou di influensia di alkohòl. E hòmber a bèk i dal den un skuter ku tabata stashoná einan, di manera ku esaki a kai i a risibí daño.

Dos testigu a mira e aksidente sosodé i a disidí di sigui e shofur ora el a sigui kore. Finalmente nan a logra par’é i a yama polis. Ora e agentenan a yega a resultá ku e hòmber no tabatin reibeweis bálido. Tambe un test di supla a mustra ku el a bebe muchu alkohòl. A deten’é i hiba warda kaminda nan a kita su reibeweis inbálido.

Algun ora despues, riba djaluna madrugá 7 di òktober den kareda di 01.50, polis a bolbe haña un notifikashon ku e hòmber ta tras di stür atrobe. Polis a drenta den akshon mesora i a konfiská e yabinan di outo na e sitio.