LIMA – A entregá Joran van der Sloot, e sospechoso prinsipal den e desaparishon di e Merikano Natalee Holloway na aña 2005 na Aruba, na outoridatnan Merikano i ta na kaminda pa Estados Unido pa enfrentá hustisia pa ekstorshon i froude. Esaki Interpol Peru ta informá.

Awe mainta tempran a trasladá Van der Sloot pa FBI i a pon’é riba un avion pa Estados Unido. Esei a tuma lugá 8.15 ora lokal for di un base militar na Lima, Peru. Mas promé a anunsiá ku e avion di FBI, ku ta transportá Joran van der Sloot, a yega Peru. Ta sospechá Van der Sloot di ekstorshon i froude kontra famia di Natalee Holloway, e Merikano ku a disparsé na aña 2005 na Aruba. E intenshon ta pa hiba Van der Sloot awe bèk Estados Unido.

Na su yegada djabièrnè mainta Joran van der Sloot lo aparesé dilanti di wes. Promé ku esei sosodé ta ten’é den un sentro di detenshon federal. Durante su promé aparishon dilanti wes lo konfront’é ofisialmente ku e kehonan. Wes lo pon’é na altura e ora ei di su derecho di keda ketu i ta mustr’é ku e tin derecho di entregá un petishon pa libertat kondishonal sperando e kaso.

For di e desaparishon di Natalee Holloway na aña 2005 e kaso di Joran van der Sloot tabatin atenshon di tur parti di mundu. Awor ku su ekstradishon pa Estados Unido a tuma lugá, ta siguiendo e pasonan hurídiko benidero di aserka.