KRALENDIJK – Den oranan di mardugá di djaweps 12 di sèptèmber, ‘meldkamer’ sentral a risibí notifikashon ku tin un boto di piskadó pèrdí riba laman. Na bordo tabatin dos hòmber ku a sali pa bai piska for di djárason 11 di sèptèmber, alrededor di 7 or di mainta i no a regresá. 

Nan no tabata telefónikamente alkansabel tampoko. Otro piskadónan a mira e hòmbernan aki lastu biaha den nan boto na altura di Bachelor’s Beach. KPCN mesora a inisiá un búskeda. 

Alrededor di 4.30 or di mardugá, helikòpter di Wardakosta a yega Boneiru i a kuminsá ku un búskeda na un altura abou riba laman te mas o ménos 6 or di mainta, pero sin e resultado deseá. Despues e avion ‘dash’ di Wardakosta tambe a bini Boneiru. 

Alrededor di 9 or di mainta a drenta notifikashon ku a enkontrá e piskadónan na Klein Bonaire. Un boto di STINAPA a bai mesora Klein Bonaire i a buska e dos piskadónan pa trese nan Boneiru. 

Boto a senk

E piskadónan tabata sano i salvo. Nan a haña kos di kome i bebe serka turistanan riba Klein Bonaire. Nan a deklará ku pa un motibu òf otro nan boto a senk i koriente di laman a hibá nan Klein Bonaire.