KRALENDIJK- Den kuadro di bishita di un barku krusero na Boneiru, Kuerpo Polisial Hulanda Karibense (KPCN), den kolaborashon ku Direktorado di Supervishon i Mantenshon di Lei (T&H) di Entidat Públiko Boneiru (OLB), a realisá un kòntròl di tráfiko dirigí. 

E kòntròl, ku a tuma lugá na stadion i waf di sùit, tabata dirigí spesífikamente riba shofùrnan ku ta transportá turista, manera taksi i otro formanan di transporte di turista. 

Durante e kòntròl a kontrolá un total di 25 vehíkulo riba muestra di un reibeweis bálido, papelnan di seguro i e pèrmitnan nesesario pa transportá pasahero. Dor di hasi e kòntròlnan aki durante momentunan drùk di temporada turístiko, manera yegada di un barku krusero, KPCN i OLB ke garantisá kondishonnan di transporte seif i regulá pa tantu bishitantenan komo residentenan di e isla.

Algun shofùr no tabatin e dokumentunan rekerí disponibel na e momentu ei den nan vehíkulo, pero esakinan a wòrdu entregá despues i a resultá di ta na òrdu. KPCN ta rekordá shofùrnan pa na tur momentu tin e dokumentunan rekerí manera un reibeweis bálido, seguro i pèrmitnan apropiá ora di transportá pasahero. 

Siguridat

E akshon konhunto aki ta enfatisá e importansia di koperashon entre polis i Direktorado di Supervishon i Mantenshon di Lei. E kòntròl ta parti di un esfuerso mas amplio pa garantisá seguridat riba karetera. Esaki no ta importante solamente pa seguridat di e habitantenan, pero tambe pa promové e bon eksperensia di turistanan na Boneiru. 

Polis ta keda alerta riba kumplimentu ku reglanan di tráfiko i lo tene mas kòntròl na momentu ku ta nesesario.