KRALENDIJK – Fundashon Plataforma Kultural i Hòfi Kultural a pone un proyekto di músika special riba pia ku ta hiba e nòmber Músika di Sklabitut Boneiru. Pa e okashon spesial aki e grupo di kanto Kanta Orkidia a invitá algun hende grandi di Rincon pa partisipá na un konsierto riba djabièrnè 14 di yüni pa 2’or di mèrdia na Mangasina di Rei.

Mamita Sint Jago, un kantante di Kanta Orkidia, ta splika ku aña pasá e miembronan di Kanta Orkidia a kolekshoná kantikanan di tempu di sklabitut ora nan tabata bishitá hendenan grandi na Boneiru. “Nos a buska teksto-, melodia- i ritmonan ku e hendenan grandi por a kòrda ainda òf ku nan antepasadonan a pasa pa nan,” e ta konta. 

E proyekto a kuminsá na aña 2023 komo parti di Aña di Konmemorashon di e Pasado di Sklabitut i ta un koperashon entre Kanta Orkidia i e orkesta di Hòfi Kultural. Riba 14 di yüni ochenta invitado lo disfrutá di un konsierto kaminda e koro di Kanta Orkidia i e orkesta di Hòfi Kultural lo presentá, ku un aporte di Arte Palabra.

E konsierto aki ta forma parti di un seri di evento ku Museo Terramar ta organisá i ku ta bira posibel tambe ku aporte di Fondo pa Partisipashon Kultural.

E logo di e proyekto ta un prikichi kolorido di Boneiru, ku ta para komo símbolo pa e kuentanan i speransa di e personanan ku a hasi katibu. Meskos ku e prikichi ta bula rònt liber i ta kanta, e músika ta ekspresá e soñonan i speransa pa libertat i amor di e personanan ku a hasi katibu.