WILLEMSTAD – Djasabra 138 sambuyadó a establesé na Kòrsou e Rèkert Mundial di Guinness pa e wega mas largu di dominó bou di awa. Ku 35 mesa e sambuyadónan a hunga dominó 23 minüt riba fondo di laman, ku kua nan a surpasá ámpliamente e rèkert anterior di sesenta sambuyadó i djes minüt.

E prestashon no tabata solamente un demostrashon di resistensia i kordinashon bou di awa, pero tabata para tambe sentral den dedikashon pa konservá nos oséanonan. E sambuyadónan, ku tabata flota riba fondo di laman, a duna un kontribushon úniko na e evento, ku a superá e posibilidatnan di deporte bou di awa.

Mitar di dos di mèrdia un representante di Guinness Records a afirmá ofisial e esfuerso pa pone e rèkert i a yama e organisadó CASHA bonbiní den e famia di rèkertnan mundial. Paralelo na e espektákulo bou di awa a organisá tambe un torneo di domino riba awa, kaminda sentenares di persona a partisipá, inkluso e konosido kampion Joaquin Martinez.

E esfuerso aki pa pone rèkert mundial a bira posibel pa medio di koperashon entre diferente skolnan di buseo CASHA, manera Bahia Diving, Central Dive, CURious2Dive, i hopi otro. 

“E Rèkert Mundial Guinness aki no ta solamente un prueba di nos posibilidatnan pa kambia límitenan, pero e ta suprayá tambe e importansia di protekshon di nos bunita oséanonan,” un representante di CASHA a deklará.