KRALENDIJK- E siudadano i alabes empresario Coen van Gennip a start un petishon ònlain pa protestá e oumento drástiko di tarifanan di Kamera di Komèrsio na Bonaire, St. Eustatius i Saba. 

Ounke segun Kámara di Komèrsio mes, a kuminsá informá trempan tokante e oumento den tarifa, ta den lat empresarionan a bin kai ariba kon drástiko e kambionan ta. Pa mayoría kliente, lo tin un oumento di 200 – 300%. 

Pa hala atenshon di Parlamentu di Hulanda, Van Gennip a kuminsá ku su petishon pa pidi Hulanda sea wanta introdukshon di e tarifanan nobo òf pa hala esaki aden bèk. 

Dentro di algun ora e petishon a haña kasi 400 firma kaba, pero Van Gennip tas pera ku mas hende lo firma. Por mira i firma e petishon aki: https://petities.nl/petitions/petition-against-the-raise-of-the-chamber-of-commerce-fees-bes-islands?locale=en

Gratis

Un punto hopi remarkabel ta ku na Hulanda e registrashon na Kámara di Komèrsio ta completamente gratis, mientras ku na Bonaire, Saba i St. Eustatius pa mayoría hende e tarifa ta bai subi di 80 dòler pa aña te na 240 dòler pa aña. Hopi komersiante ta puntra nan mes kiko eksaktamente Kámara lo hasi adishonalmente di loke semper e tabata hasi, pa hustifiká un oumento asina drástiko.