Kralendijk- Algun asosiashon di dunadónan di trabou na Boneiru a disidí pa lanta un asosiashon nobo konhunto komo doñonan di trabou.

“Tabata un deseo ferviente ku e asosashon di dunadó di trabou na Boneiru lo a uni i fungi komo un partido tumando asiento den e “Centraal Dialoog Bonaire”(Diálogo Sentral di Boneiru). Den e último lunanan e kuater organisashonnan: Bonaire Hotel and Tourism Association (BONHATA), Bonaire Business and Employers Association (BBE), Bonaire Hospitality Group (BHG) i Bonaire Innovation and Commerce Council (BICC), a reuní intensivo riba formashon di un asosashon konhunto di dunadó di trabou”, asina e organisashon nobo ta skibi den un relato di prensa.

Nòmber di e asosiashon nobo ta Business Federation Bonaire (BFB). E kuater gruponan aki ta traha huntu den un federashon nobo ku mira riba representashon konhunto pa loke ta trata kuestionnan relatá n’e dunadó di trabou.

Diálogo sentral

E partidonan aki tambe ta tuma asiento konhunto komo BFB den e “Centraal Dialoog” i tambe den konsultanan ku otro organisashonnan, kaminda e interes di e dunadó di trabou na Boneiru ta keda representá. Naturalmente, kada asosiashon ta keda operá independiente, manteniendo nan propio identidat i nan lo keda sali na defensa di interes di nan miembronan.

Ayera a firma e protokòl pa establesé BFB. E hunta ta konsistí di: Luite Berkenbosch (presidente, BONHATA), Nadine Emerenciana (sekretaria, BICC), Eddy Carillo (tesorero, BBE), Paul Coolen (vice presidente, BHG). Bas Noij (miembro, BONHATA)

E fundadónan ta konvensí ku e lansamentu di BFB ta forma un paso importante den nan kolaborashon, na benefisio di mundu empresarial di un Boneiru sustenibel i próspero.