KRALENDIJK – Na 2022 a polis parti hopi ménos but pa motibu di violashon di tráfiko kompará ku aña 2021. Aña pasá a detené 104 shofùr ku tabata kore bou di influensia di alkohòl.

Na 2022 a parti na tur 537 but. Un aña promé esei tabata masoménos 1.200. Segun polis un splikashon pa esaki ta ku e aña ei a duna mas tantu atvertensia na lugá di but. Sinembargo den un konferensia di prensa ayera polis ta informá ku mientrastantu a parti den e promé lunanan di 2023 mas tantu but ku den henter 2022.

Na 2022 a detené 104 shofùr pa korementu bou di influensia di alkohòl. Den e promé lunanan di e aña aki a detené kaba 47 shofùr ku a bebe dimas. Awendia shofùrnan ku ta embolbí den un aksidente tambe mester hasi un tèst di alkohòl. Ademas Kuerpo Polisial di Hulanda Karibense ta bai tene kòntròlnan espontaneo i tambe anunsiá na fiesta- i eventonan.