WILLEMSTAD – Awe mainta polis mester a bai un snèk na Gato pa motibu di un kiebro. Sinembargo no tabata un kiebro komun, pero un sakeo total, kaminda no a laga nada atras.

Den oranan tempran di mainta e snèk, konosí komo Gato snèk, a haña bishita di kriminalnan ku tabatain un solo meta: bai ku e inventario kompleto di e snèk.

Polis a buska e doñonan pa informá nan, pero ta parse ku nan ta ku fakansi na China. Esei a duna e ladronnan chèns pa pluma e nogoshi den tur trankilidat.

Nan a kuminsá ku kibra e lusnan di pafó di e snèk, pa asina nan por a habri e porta den skuridat ku un sleiptòl. E ladronnan ku a ‘limpia’ e lugá, a bai entre otro ku kahanan di serbes, e kontenido total di e frizer i di e rèkinan.