ORANJESTAD – A imponé regla muchu severo riba Rubianonan durante e pandemia di korona i a bolbe hasi esei ku e tormenta Bonnie luna pasá, Viola van Bogaert ku ta hurista den Derecho Estatal i Derecho Atministrativo ta konkluí. “Bo por bisa ku siguransa ku a sera hendenan ilegalmente na kas”, e ta bisa na Caribisch Netwerk.

Segun e hurista  gobièrnu di Aruba ta skohe muchu fásil pa medidanan di emergensia ku ta limitá libertat di hende. Anto huntu ku esaki gobièrnu ta pèrdè e proporshon for di bista. Komo ehèmpel e ta duna kon nan ta detené e hendenan ku ta pone nan sushi pafó.

Ku e tormenta Bonnie luna pasá a bolbe bai robes, segun Van Bogaerts. Pakusnan mester a sera i a obligá hendenan pa keda 12 ora largu paden. Segun e hurista ta medidanan ku ta bai muchu leu i ku tambe ta tumá ’ilegal’.

Gobièrnu di Aruba ta reakshoná iritá riba preguntanan di Caribisch Netwerk. Promé Minister Evelyn Wever-Croes ta desmentí ku e medidanan di emergensia durante tormenta Bonnie tabata ilegal òf eksaherá i ta skonde tras di konseho di su ámtenarnan.

“Mi no a haña keho di ningun hende; no di siudadanonan, komersio, kolegio di abogado. E úniko hende ku ta okupá su mes ku esaki, ta abo. No tabatin mester di lei. Esei ta e konseho ku mi a haña di tim di krísis”, e Promé Minister ta bisa reportero Sharina Henriquez. 

Rino Hermans di Bureau Rampenbestrijding  tambe ta reakshoná iritá. “Boso komo prensa semper ta buska konfrontashon. Tabatin un menasa grandi, un situashon di emergensia. Bida di hende i infrastruktura tabata kore peliger i e ora ei Promé Minister tin mag di hasi tur esaki”.

Segun Van Bogaert e iritashon ta debí na e echo ku gobièrnu di Aruba sin duda ta sinti ku por bin problema pa loke ta trata e base legal di e medidanan ku a tuma. Reakshon di polis i Ministerio Públiko den esaki ta signifikativo. Nan no a aktua durante ku Bonnie a pasa i no a parti ningun but.