KRALENDIJK – Djabièrnè den oranan di anochi un kòntròl multidisiplinario di ‘ondermijning’ a tuma lugá na 2 diferente establesimentu di hóreka na Kaya Korona.

Na yegada na e establesimentunan di hóreka un tim multidisiplinario, konsistiendo di Inspekshon di Labor CN, Kuerpo Polisial Hulanda Karibense, Belastingdienst CN, Douane CN, Servisio di Imigrashon i Naturalisashon CN i RIEC CN (Regionale Informatie- en Expertisecentrum CN) a sera e establesimentu di hóreka i kontrolá tur esnan presente.

Durante e kòntròl a topa ku tres persona sin dokumento bálido i un persona ku ta permanesé di forma ilegal riba e isla. Belastingdienst lo ehekutá un investigashon mas detayá na tur 2 lokalidat. 

E kòntròl ta konsekuensia di un propósito di e partnernan den e relashon di kolaborashon  di RIEC CN pa enfoká riba un mihó manera pa atendé ‘ondermijning’* den hóreka.

Ròl krusial

E relashon di kolaborashon RIEC CN ta hunga un ròl krusial den enfoke di ‘ondermijning’ den Hulanda Karibense. Pa medio di e kolaborashon i kompartí informashon entre e diferente instansianan ta amplia e efektividat di kòntròl i intervenshon, ku meta pa garantisá i oumentá seguridat i integridat di Hulanda Karibense. Banda di esei por traha huntu riba konsientisashon i prevenshon.