BOGOTÁ- Despues di un bataya hurídiko ku a dura años, e kompania di aviashon kolombiano Empresa Aérea de Servicios y Facilitación Logística Integral S.A (Easyfly S.A.) ta bai kambia su nòmber pa Clic. 

E kompania, ku ta operá un ret basta ekstensivo di rutanan regional na Kolombia, a wòrdu demandá diferente biaha pa e kompania Easyjet di Gran Bretaña. Segun Easyjet, Easyfly S.A. di Kolombia tabata hasi uso di similaridat di e nòmber pa atraé mas kliente, algu ku e kompania kolombiano semper a desmentí. Mester remarká tambe ku e palabra Easy a wòrdu depositá dor di Easyjet komo marka protehá

Apesar ku korte na Londres no a kondená Easyfly pa paga daño na e kompania britániko, aparentemente si a ordená Easyfly pa kambia nan nòmber

Splikashon

Easfly sinembargo a duna un otro splikashon na su desishon. “Pa selebrá nos éksisto i nos kresementu, nos a tuma e desishon pa duna e kompania un rebranding, introdusiendo e nòmber Clic”, asina e aerolínea a komuniká den fin di siman tras di loma. Mientrastantu ya ta pintando e promé avionnan pa sali ku un logo i nòmber nobo. 

Easfly ta operá un fleta primeramente di avionnan ATR i, for di aña pasá, tin un akuerdo di kódigo kompartí ku entre otro Avianca, riba sierto ruta den Kolombia ku Avianca mes no ta bula mas.