AMSTERDAM/STOCKHOLM – Na komienso di siman aki, aliansa di aviashon Skyteam, formá pa entre otro Delta Airlines i AirFrance/KLM i Scandinavian Airline System (SAS), a firma un akuerdo komo un paso importante pa entrada ofisial di SAS den e aliansa di aviashon global. 

For di 1 di sèptèmber 2024, SAS lo forma parti ofisialmente di SkyTeam, ampliando asina e aliansa ku akseso na e húpnan klave na Skandinavia. Te asina leu SAS tabata parti di e aliansa rival, Star Alliance, di kual SAS tabata un di e fundadónan. 

E kambio a bini despues di un invershon konsiderabel di parti di Air France/KLM den e kapital di akshon di SAS. Air France/KLM ta awor e akshonista prinsipal banda di gobèrnashon di Dinamarka. 

Por spera ku e kompania di aviashon Franko-Hulandes lo amplia nan partisipashon aktual den e empresa. 

Benefisio 

“Klientenan di SAS lo haña benefisio for di e presensia global fuerte di SkyTeam den hopi di e prinsipal húpnan di aviashon di mundu i for di e enfoke riba partneronan estratègiko i inisiativanan inovativo di sostenibilidat”, asina direktor di SAS, Anko van der Werff, a bisa. 

Tambe ta premirá ku SAS lo drenta den e akuerdo di Huntu Bentaha pa bòlunan entre Europa i Estados Unidos, kaminda Delta Airlines, AirFrance/KLM i Virgin Atlantic ya ta partisipá.