KRALENDIJK – Kasi tres siman despues di un despegue mal ehekutá di un avion di Sarpa, Bonaire International Airport (BIA) porfin a konfirmá e insidente di forma ofisial. E Jetstream di Sarpa tabata mal di line-up pa despegue for di pista número 10, loke a kousa daño na algun lus di pista.

“Djasabra anochi 18 di mei, un avion Jetstream 32 a hasi un despegue for di Flamingo Airport. Durante esei algun lusnan di pista a risibí daño. E dañonan na e lusnan di pista a wòrdu drechá promé ku e siguiente buelo. E insidente a keda raportá di inmediatamente na outoridatnan pa Bonaire International Airport (BIA),” segun e deklarashon di BIA djarason.

Konseho pa Investigashon di Seguridat

E aeropuerto ta bisa ku despues di e incidente, un investigashon a tuma lugá pa Konseho Hulandes pa Investigashon di Seguridad (OvV). “OvV a yega na e sitio pa e investigashon. Naturalmente, segun BIA a bisa, e aeropuerto a duna tur kooperashon nesesario pa e proseso di investigashon.”

Un lenk a wòrdu kompartí pa BIA ku e website di OvV, pero esaki ta duna masha poko informashon adishonal. Un deklarashon korto di OvV ta menshoná ‘un daño liviano’ na e wil parti dilanti di e avion. Por lo demas, no a duna mas detaye.