KRALENDIJK – Djaluna, aeropuerto di Boneiru a selebrá su aniversario di manera festivo. Ounke e aeropuerto ta selebrá awor su di 79 aña di edat, realmente su historia a kuminsá algun aña promé ku esi, ku e konstrukshon di e promé pista di aterisahe na e kaminda di promé aeropuerto na Subi Blanku.

Minister Harbers di Infrastruktura i Maneho di Awá (I&W) tambe a partisipá den e selebrashon ofisial. Den su diskurso, Harbers a bisa ku e isla tin un aeropuerto di kual e por ta orguyoso, pero ku esaki ta trese kun’é tambe sierto responsabilidat, entre otro di hasi invershon nesesario. Huntu ku direktor di aeropuerto Maarten van der Scheer, e minister a inspektá e lusnan di e pista. Dentro di poko, mester bai hasi invershon kuantioso den entre otro lusnan nobo. 

Durante su diskurso, Van der Scheer a gradisí e empleadonan di aeropuerto i e otro partnernan ku kual ta traha na aeropuerto. “Ta nan ta esnan ku ta hasi tur kos posibel.” Tantu Minister Harbers komo Van der Scheer a referí na diferente proyekto pa gradualmente mehorá e fasilidatnan na aeropuerto. Van der Scheer a ekspresá tambe di ta positivo pa e echo ku tin un kresementu saludabel den kantidat di pasaheronan durante aña 2023 i e promé kuartal di 2024. 

Bin bek

Diputado Clark Abraham tambe a felisitá e aeropuerto ku su hubileo i a gradisí Minister Harbers pa su presensia. “Pero bo mester primintí sí pa bin bèk e aña ku ta bini aki pa e di 80 aña di eksistensia”, Abraham a bisa ku un kinipí di wowo. 

Aunke ku Harbers aktualmente ta minister den un gobièrnu demisionario, Abraham no a deskartá e posibilidat ku e minister mes lo tei ainda na aña 2025. “Bo no sa nunka ku polítika na Hulanda” Abraham a bisa Harbers, agregando ku konsehonan ehekutivo na e isla sa kambia hopi mas frekuentemente, ku ta e kaso ku gabinete na Hulanda.