Kralendijk- Despues di algun tempu di preparashon, ta mustra ku aeropuerto Flamingo ta bai haña su propio fasilidat pa por tèst biaheronan ku ta yega e isla riba presensia di e virus di Covid-19.

E fasilidat pa tèst biahero, ta hopi importante pa por trese bèk buelonan direkto for di Merka, ku te asina leu no por baha na Boneiru sin mas.

Negosashon entre Boneiru i Hulanda, sinembargo, ta hasiendo e fasilidat nobo aki un realidat. E sentro di tèst lo mester kuminsá funshoná dia 25 di mei próksimo.

E fasilidat na airport lo bai wòrdu manehá dor di e mesun kombinashon ku ta funshonando bou di BonaireSafeTravel awor, ku ta e kompania Hestia CVC di hulanda, huntu ku BonLab.

Síntoma

Direktor di Hestia, Xander Schurink, ya pa algun tempu ta boga pa tèst hende na yegada, i no (solamente) promé ku nan biaha. Segun Schurink, eksperiensa ta mustra ku tin biaha e pasahero no ta tèst positivo na komienso di e biahe, pero ora e yega si e tin síntoma. Pasahero ku ta tèst positivo na yegada, lo mester bai den karentena.

E desaroyo di un fasilidat pa tèst hende na BIA, ta wòrdu mirá komo esensial pa por traha riba rekuperashon di e turismo, spesialmente turismo for di Merka.