MARIGOT, St. Martin – Vários luna despues di a wòrdu kumprá pa e grupo Edeis i gobièrnu di Saint-Martin Fransés, Air Antilles por fin a risibí e sertifikado di transporte áreo (CTA) for di e outoridat di aviashon sivil franses. 

Esaki ta permití e aerolínea pa resumí su operashon. E aerolínea ta spera di rekonektá na promé instante e islanan di Saint-Barthélemy, French St. Martin, Guadeloupe, i Martinique. Durante e periodo anterior, a dediká hopi trabou pa kumpli ku e rekisitonan di e Direktion Générale de l’Aviation Civile (DGAC) di Francia, manera un mantenshon pisá riba e kuater avion, i treinen di e pilotonan. E kolektividat di Saint-Martin i otro akshonistanan a reakshoná ku alivio riba e notisia. Lo kuminsá dentro di poko ku benta di pasashi via kanalnan di kustumber.

Winair i CaribSky

Air Antilles tabata un partnèr importante di Winair, basá na St. Maarten Hulandes, poniendo disponibel avion pa e rutanan mas largu, manera esnan pa Aruba, Bonaire, i Curaçao. 

Un konflikto laboral prolongá despues di un wèlga di algun siman a kondusí na un fayit kontrolá aña pasá ku plannan pa sigui ku un aerolínea hopi mas chikitu ku algun tempu atras. 

Promé ku e kompania a bai bankarota, tabata koperá tambe ku Winair i Liat den e asina yamá Aliansa CaribSky, pero si esaki lo wòrdu rebibá atrobe, ainda no ta konosí. Liat, basá na e isla di Antigua, tambe ta pasando den un proseso pa kuminsá bula bèk despues ku e kompania Liat1974 a drenta den proseso di likidashon for di aña 2020.