KRALENDIJK – Djaweps 28 di novèmber KPCN lo organisá un akshon di limpiesa di e área di warda di polis ku ta kontené artíkulonan konfiská (beslagruimte). Ta posibel ku en konekshon ku esaki, lo destruí vehíkulonan. Di sierto artíkulo i vehíkulo e doño no ta konosí. 

Pa e motibu aki KPCN ta hasi un yamada na tur doño di vehíkulonan di dos wil ku a konfiská òf ku ta den “bewaring” pa mèldu nan mes via meil na [email protected].

Komo doño mester mèldu ku un prueba di kompra i mester kumpli ku e lei- i reglanan pa loke ta konserní uso di vehíkulo. Aki por pensa riba por ehèmpel un reibeweis bálido i un prueba di seguro. 

Lo destruí tur vehíkulo ku no a rekohé promé ku djárason 20 di novèmber den e akshon di limpiesa di djaweps 28 di novèmber. Tambe lo inkluí  vehíkulonan pa kua tin un poder hudisial pa destruí i/òf ku mester retirá for di tráfiko di forma adekuá den e akshon di limpiesa aki.