KRALENDIJK – Shofùrnan riba Kaminda Gobernador Debrot den direkshon di e kaminda turístiko, lo sinti un alvio awor ku Entidat Públiko Boneiru (EPB) a drecha e último pida di e kaminda Gobernador Debrot, banda di ofisina di Stinapa i Caribbean Club. 

E kaminda ya pa basta tempu tabata un desaster kompletu ku hopi buraku. Esaki ta èkstra ferfelu mirando ku diariamentu tin basta turista tambe ku ta keda transportá riba e kaminda aki ora di bai hasi un tur pa parti nort di e isla. 

Esaki ku siguridat lo no a kondusí na un imágen positivo di nos isla. 

Despues di poko molèster den último dianan pa drechamentu di e kaminda, awor si e kaminda ta den un estado hopi mas mihó manera e pòtretnan ta mustra.