KRALENDIJK- E asina yamá ambilift, un vehíkulo spesialisá pa trese pasaheronan ku limitashon òf den rolstul a bordo na un manera kómodo i seif, ta práktikamente kla pa kuminsá usa. 

Esaki segun direktor di aeropuerto Maarten van der Scheer a bisa den kontesta riba preguntanan di prensa. 

Siman pasa tabatin hopi diskushon riba sosial media tokante un pasahero amerikano ku a deskribí su eksperensia ku e manera ku nan a yank’é for di su avión ku a yega. “Inhumano i humiyante,” e pasahero a skibi entre otro. Aktualmente ta hisa pasaheronan den ròlstul den un stul chikitu ku ta wòrdu hisá òf bahá for di e avion pa dos òf mas hende di e personal na tera. Según e pasahero a skibi, e forma ku ta trata ku pasahero desabilitá na BIA lo por ta asta kontra e lei na Merka pa trato di personanan desabilitá (ADA). 

Van der Scheer ta rekonosé ku e situashon aktual ta hopi leu for di ideal. “E bon notisia ta ku e ambilift, ta práktikamente kla pa yusá.” Segun Van der Scheer, nan ta trahando riba e último detayenan. “E ambilift ya ta na e isla, pero tin algun preparashon ku mester wòrdu hasi promé ku por pone’l na uzo. Dokumentashon mester wordu organisá, i tambe e personanan ku lo operá’l mester wordu entrená den su yusansa.”