WILLEMSTAD – American Airlines a anunsiá e skema di wenter di mas grandi den su historia pa Karibe i Amérika Latino. 

E kompania a disidí entre otro pa ámplia e buelonan entre Kòrsou i Charlotte na North Carolina pa un buelo diariamente. E kompania ta pone un Boeing 737 riba e servisio regular, ku lo dura kuater ora, luchtvaartnieuws.nl ta informá.

Ku dos ruta nobo i frekuensianan ámplio riba 21 ruta American ta fortifiká, manera e mes ta bisa, su puesto komo e kompania di aviashon mas grandi ku ta bula nòn-stòp entre Estados Unido i Mexico, e área Karibense i Amérika Latino. 

Den e wenter di 2023 American ta bula mas ku 2.250 buelo semanal pa nobenta destinashon den region, loke ta nifiká un oumento di djes porshento di kapasidat di stul kompará ku e wenter di 2022.