ORANJESTAD – Gobièrnu di Aruba ta hasiendo sin duda esfuersonan kuantioso den lucha kontra trafikashon di hende, pero no ta kumpli ainda ku e normanan mínimo pa eliminá trafikashon di hende, gobièrnu di Merka ta informá den su Trafficking in Persons-report 2022 ku nan a kaba di publiká. 

E esfuersonan aki ta enserá identifiká mas viktima, hasi mas investigashon di trafikashon di hende i duna kursonan pa funshonario.

Pero e nivel di esfuerso ta kedando riba e mesun nivel ku aña pasá, no ta nota adelanto. Pa e motibu ei Aruba ta keda riba Tier-status 2-watch, sea ku tin pandemia di corona òf nò, esei no ta kambia nada na e nivel,  segun e rapòrt.  

Den último sinku añanan, trafikantenan di hende a eksplotá viktimanan lokal i internashonal na Aruba. Trafikantenan di hende ta eksplotá muhénan Benesolano den negoshi di sèks i hòmbernan i muhénan di eksterior pa trabou forsoso. Spesialmente den sektor di brinda servisio i den konstrukshon. Muhénan Benesolano ta hopi vulnerabel pa industria di sèks fòrsá.

Pero famianan di Aruba komun i koriente meskos ku empresarionan tambe ta eksplotá  personanan ku ta hasi trabou di kas. Den konstrukshon, sèks komersial, pero tambe den supermerkadonan ta fòrsa hòmber i muhé Chines pa traha.

Proaktivo

E reklamo di mas grandi ta ku gobièrnu di Aruba ta stèns muchu riba denunsianan di víktimanan i no ta sali proaktivo bai buska e trafikantenan di hende. Meskos ku na Korsou servisionan di investigashon ta tira trafikashon di hende i introdukshon ilegal di migrante riba un monton, lokual tin komo konsekuensia ku ta opstakulisá efektividat di persiguí i prevenshon i ku no tin protekshon.

Estados Unido den su relato no ta mira Aruba komo un pais riba su mes, pero komo parti di Reino Hulandes. P’esei  ta fiktisio pa pèrmití un ‘Tier’. Na ora di evaluá ta asumí ku Aruba ta un pais independiente. Esei ta posibel pasobra Reino no ta ofresé un kontribushon importante na gobièrnu di Aruba den lucha kontra trafikshon di hende.