KRALENDIJK- E sentro di ekspertisio pa enseñansa (EOZ) ta bai habri ku nan lo kuminsá un skol supsidiá pa tur alumno ku nesesidatnan spesífiko den enseñansa. Esaki ta nifiká ku e skol aki ta grátis pa tur alumno, pues mayornan no mester aportá finansieramente. 

E instituto di edukashon aki lo karga nòmber di un baluarte boneriano ku a nifiká hopi pa muchanan i skolnan aki na Boneiru. Durante e seremonia ofisial e nòmber di e baluarte aki lo wòrdu hasí konosí. 

E ophetivo di e skol aki ta pa brinda enseñansa dirigí riba nesesidat individual di alumnonan ku pa kualkier motibu no ta desaroyá optimal den enseñansa regular. E instituto di edukashon aki ta pa alumnonan di 4 te ku 14 aña di edat ku ta enkontrá desafio riba tereno di siñamentu, komportashon òf problemanan di salú mental. 

Ta trata spesífikamente di alumnonan ku tin nesesidat di un guia spesialisá den enseñansa pa por alkansá independensia den nan bida. Loke ta hasi e skol aki úniko ta e echo ku kada alumno lo wòrdu guiá dor di un tim spesialisá di maestronan i profeshonalnan den enseñansa. Alumnonan ku bini na remarke lo haña lès basá nan nesesidatnan spesífiko den klasnan mas chikitu. 

Atmishon

Por wòrdu atmití na e skol aki via di e siguiente prosedura. Pa alumnonan ku ta inskribí na un skol supsidiá, e petishon mester wòrdu hasí dor di e skol ku e alumno ta bishitá aktualmente. Alumnonan den e kategoria di edat ariba menshoná, pero ku no ta inskribí na un skol supsidiá mester traha un sita na EOZ. 

Atmishon na e skol pa rekursonan spesial den enseñansa aki ta wòrdu evaluá dor di un komishon spesial asigná. Un alumno no por yega na remarke pa un lugá sin e envolvimentu di EOZ Bonaire. Mayornan ku tin pregunta por tuma kontakto ku EOZ via di meil ([email protected]) òf yama na (717-4144) pa un sita.