WILLEMSTAD- Apesar di hopi problema ku tabata tin último simannan ku operashon di JetAir Caribbean, tòg por a skucha hopi reakshon di shòk djaluna ora a bira konosí ku Jetair lo por stòp di bula i pidi bankarota di e kompania pa problemanan serio di pago.

For di djadumingu por a skucha vários rumor tokante posibel bankarota, pero awor.nu no por a konfirmá esaki di fuentenan di digno kredibilidat.

For di ayera tabata tin otro problema operashonal, ora ku un buelo di Kòrsou pa Medellín mester a bira bèk pa Kòrsou pa motibo di problema ku e piloto automátiko di e avion Fokker 70. Despues di a hasi algun reparashon, e buelo a sali kasi ku 6 ora di retraso, pa yega Kòrsou bèk banda di 6 ‘or i 15 di atardi. Un buelo ku mester a operá pa St. Maarten ayera tardi no a operá mas.

Pa awe mainta sí a operá un buelo pa St. Maarten, siguí pa uno pa Kingston. Pero despues di esei ta parse ku desishon mester a kai di pidi sea protekshon kontra di kreditor (surceance van betaling), òf bankarota mes.

E situashon di Jetair pa basta tempu tabata penoso, i a laga e kompania ku un solo avion operashonal, loke no a yuda den su operashon di un manera stabil i konfiabel.

Komunikashon

Djaluna anochi mes, vários medio ki komunikashon a purba haña kontakto ku gerensia di Jetair, pero no por a haña konfirmashon kiko eksaktamente ta e situashon di e kompania. For di algun luna por a skucha ku doño di e kompania, Ribeiro, lo a laga sa ku e no ker a sigui hinka mas plaka den e operashon, ku semper a hiba perdida.

Ya ku no tin klaridat riba kontinuidat di Jetair, tampoko ta konosí kiko lo pasa ku pasahero ku lo por keda pegá na vários pais, prinsipalmente St. Maarten i Colombia.