KRALENDIJK – Kuerpo Polisial Hulanda Karibense a konfiska diferente arma di kandela falsu ku tabata na benta na un supermerkado na Boneiru riba djarason 8 di mei. Pa e motibu aki, a traha un akuerdo ku e empleado enkargá di e supermerkado pa no bestèl ni bende e armanan di kandela falsu aki mas. 

Arma di kandela falsu por kousa situashonnan peligroso pa motibu ku nan ta difísil di distinguí for di un arma di kandela di bèrdat. Polis semper ta asumí ku un arma ta di bèrdat, kual por trese situashonan peligroso, problemanan hurídiko, un but òf te hasta detenshon. Tambe e por hinka públiko presente den pániko, kual ta pone seguridat públiko den peliger. 

Pa e motibu aki, KPCN i Ministerio Públiko (OM) ta hasi un yamada urgente na un i tur: si bo ta den poseshon di un arma di kandela falsu, entregá esaki mas pronto posibel na warda di polis di Playa. Por entregá arma di kandela falsu te ku djabièrnè 31 di mei 2024 sin konsekuensia adishonal. Den kaso ku haña bo den poseshon di un arma di kandela falsu, bo por risibí un but òf por te hasta detené bo ku chèns di persekushon hudísial. 

Paga tinu, aki ta trata di arma di kandela falsu ku por konfundí ku un arma di bèrdat, manera e armanan di kandela falsu riba e potrèt. Otro arma di hugete ku ta opviamente identfikabel manera un kos di hunga, no mester bin entregá.

Ta pidi mayornan pa papia ku nan yunan tokante e riesgonan i konsekuensianan di ta den poseshon di arma di kandela falsu. Huntu nos por sòru pa un komunidat seif dor di tuma arma di kandela falsu na serio i tuma akshon.