ORANJESTAD – Aruba a bolbe prolongá e seramentu di  frontera aéreo ku Venezuela ku tres luna te 21 di aprel. Esaki ta enserá tantu aviashon general komo komersial, pues pasahero, karga i servisio postal. Manera ta konosí Kòrsou a habri e frontera aéreo pa mas ku nuebe luna kaba.

Promé minister di Aruba, Evelyn Wever Croes, a atmití resientemente ku tin un chèns ku ta habri e frontera di nobo denter di poko, pero solamente pa karga aéreo. Esaki den koperashon estrikto ku Venezuela, meskos ku ta e kaso awor ku frontera marítimo, ku a habri resientemente pero solamente pa karga manera fruta i bèrdura.

Venezuela ta keda riba e lista di paisnan ku servisio di informashon Hulandes a publiká i ku ta konsiderá komo un menasa pa seguridat nashonal. A instituí e prohibishon aki na promé instante for di 9 di mart 2020 komo parti di e medidanan kontra e pandemia di Covid-19 e tempu ei, pero ta prolongu’é awor, asta despues ku no tin restrikshonnan di Covid-19 mas.