KRALENDIJK – Den nos rúbrika ‘Bèk na Boneiru’ nos ta sigui personanan Boneriano ku a lanta na Boneiru, a traha òf studia den eksterior, pero despues ta bini bèk atrobe. Den e di ocho seri nos a papia ku Naidy Cicilia-Marchena. El a konosé situashonnan desafiante den su hubentut. Aktualmente e tin un empleo eksitoso den hòspital di Fundashon Mariadal. Abo sa, òf konosé un hende ku un storia úniko? Tep redakshon.

Nasé den e bario di Antriol, Boneiru, den un famia di seis, Naidy Cicilia-Marchena su hubentut no tabata semper fásil. Su mama, Ida Cicilia, tabata un yùfrou di skol ku pa gran parti a lanta su kuater yunan su so. “Mi mama tabata un diehard, un persona ku ta perseverá i ku no ta bèk pa nada”, segun e yu muhé Cicilia-Marchena, ku ta wak bèk ku orguyo riba su añanan di hubentut. “E mester a lucha semper duru pa su kuater yunan. I despues tambe pa su ñetunan. Mi tin hopi rèspèt pa esei. No tabata fásil p’e. Apesar di rekursonan limitá, el a hasi semper esfuerso pa nos,” Cicilia Marchena, ku no tin yu ainda, ta kòrda.

Na edat di djeskuater aña e famia a disidí di muda pa Hulanda. “Si, esaki tabata realmente pa motibunan di salú den nos famia”, segun Cicilia-Marchena. Tambe mi mama a haña ku ta mihó pa nos karera pa muda.”

Di e manera aki henter famia a muda pa Hulanda. I esei no tabata fásil. Tur e yunan mester a kustumbrá ku e kambionan. Na Hulanda Cicilia-Marchena a traha konstantemente riba su karera. Despues di skol sekundario el a optené diferente diploma i sertifikado riba nivel di MBO i HBO. Despues di su estudio el a traha entre otro pa Postbank i e munisipionan Den Haag i Rotterdam. Tambe el a okupá diferente funshon, entre kua trahadó sosial i guia di trabou. “Mi a hasi i realisá hopi kos einan. Esei ta pasobra mi gusta traha,” segun Cicilia-Marchena.

Na aña 2021 Cicilia-Marchena a disidí di regresá Boneiru. El a solisitá komo trahadó sosial na hòspital di Fundashon Mariadal. Aki tambe nan a ripará aparentemente ku Cicilia-Marchena ta un trahadó duru. Su solisitut a bai eksitoso. Cicilia-Marchena por a kuminsá rápido. “Nan a tumami na trabou i e ora ei mi karera a kuminsá riba e isla. For di e tempu ei mi ta traha den hòspital,” e ta konta ku orguyo. Tabata un tempu emoshonal. Esei ta debí ku su mama, ku a hasi hopi p’e den su hubentut, a fayesé na aña 2022 na Boneiru. Su mama tabata ku fakansi na Boneiru, pero pa motibunan médiko no por a bai Hulanda bèk.”

Den hòspital Cicilia-Marchena a haña un puesto agradesido. Ku su eksperensia ku el a atkirí, e por nifiká algu pa Boneiru. “Mi ta sinta huntu na momento ku tin konsultanan di fase paliativo di pashèntnan den hòspital. Esaki ta intenso, pero un trabou hopi agradesido. Mi ta agradesido pa e trabou ku mi por ehersé na Fundashon Mariadal,” e ta konta.

Pa Cicilia-Marchena e transishon di Hulanda pa Boneiru tabata hopi eksitoso, apesar di e pèrdida di su mama. No sosialmente so, pero tambe privá. El a kasa na Boneiru. Tambe el a bira un hungadó di sòftbòl aktivo, despues ku el a sera konosí ku e deporte na Hulanda. Aki e ta hunga den un tim na Kòrsou i na Boneiru. Apesar di su eksperensianan na Hulanda e ta kontentu ku el a bolbe Boneiru bèk. E ta enfatisá e oportunidatnan ku Boneiru ta ofresé personanan ku ke hasi karera  i e sentimentu di yega kas bèk ku e isla ta dun’é. “Mi ta sinti ainda ku mi ta ku fakansi,” e ta bisa hariendo. “Pero mi ta kere ku tur hende por konstruí un bida eksitoso na Boneiru ku e abilidatnan korekto, motivashon i perseveransia.”