KRALENDIJK – E asina yamá ‘biketeam’ di Kuerpo Polisial Hulanda Karibense a introdusí su ünifòrm nobo durante e siman di Regatta. E ünifòrm nobo ta un polo shùrt koló blou skur di material fini ‘Dri-fit’ dor di kua aire ta pasa mas fásil ku ta mihó pa e klima kayente kompará ku e ünifòrm ku e polisnan riba baiskel tabata usa anteriormente. 

E ünifòrm ta úniko na Boneiru i lo ta visibel pa e siudadano tambe. E ta rekonosibel na e emblema di polis parti dilanti na banda robes i patras riba lomba. Ta trata pues di agentenan polisial di KPCN den un otro ünifòrm for di loke bo a kustumbrá.

E ‘biketeam’ ta eksistí for di 2009 i ta un tim di agente polisial sertifiká ku a pasa diferente treinen spesial pa nan por aktua di manera adekuá den nan ròl di polis riba baiskel na momentu ku ta nesesario. Meta di esaki ta pa engrandesé e visibilidat di polis. 

Mobil

Un di e benefisionan mas grandi ta ku e ‘biketeam’ ta hopi móbil; nan por bira rápido i por pasa fásil dor di multitut, hanchi i kayanan smal. Pesei e ‘biketeam’ ta ideal pa patruya durante di temporada di barku krusero òf otro aktividat kaminda tin hopi hende riba kaya. 

Na momentu ku algu sosodé nan por move di manera fásil di un área pa otro área ku ta será pa outo òf kaminda outo no por yega fásil. Ademas nan ta bon visibel i fásil pa aserka. Asina polis ta mas serka di komunidat.

Durante di Regatta 2024 e ‘biketeam’ lo ta aktivamente visibel riba kareteranan di Boneiru.