WILLEMSTAD – E departamentu di pèrmit di kuerpo polisial a hasi 94 kontròl durante Gran Marcha djadumingu último, pero mester a sera solamente dos establesimentu di bende kuminda.

A hasi e kòntròlnan ku ayudo di Inspekshon di ministerio di Desaroyo Ekonómiko. E dos establesimentunan aki no tabatin pèrmit pa pone loutspiker pafó i ademas nan tabata toka músika ku tekstonan no apropiá.

A hasi e kòntròlnan den 49 establesimentu di bende kuminda, na 33 sitio kaminda hendenan tabata bende diferente  artíkulo i serka djesdos bendedó ambulante ku tabata bende produkto riba kaminda públiko.

Detenshonnan 

Otro tim di kòntròl a hasi kòntròl preventivo riba djesun persona durante dia marcha di karnaval.

Den e kuadro di e maneho ojo-por-ojo di Ministerio Públiko i polis a hasi 22 detenshon. A detené shete persona pa delito di narkotráfiko, un detenshon pa instigashon, dos pa menasa i shete pa violensia. A bai ku sinku persona ofisina pasobra nan no kier a sigui órden di polis.

Den kuadro di e proyekto Aktua Robes, Sinti’é un Bes Ministerio Públiko a kobra na tur 415 florin na transakshon i un persona a paga un areglo mésora.

A hiba tur sospechoso dilanti di un fiskal di hustisia interino, ku despues di interogashon a ordená enkarselamento di e kuater sospechosonan en espera di mas investigashon.

Bandabou

Na Bandabou e outoridatnan no mester a tuma ningun akshon durante  kòntròlnan djaluna durante marcha. Solamente a taha personanan individual ku tabata bende Mojito for di nan kas pa no sigui ku esei.

Komo parti di e proyekto Aktua Robes, Sinti’é un Bes a detené un kabayero ku no a sigui órden di polis.