KRALENDIJK – Siman ku a pasa boluntarionan a hiba produktonan di nesesidat di Boneiru pa Union Island. Union Island ta parti di Sint Vincent & Grenadines. Nan tabatin hopi mester di e produktonan. Segun promé minister Ralph Gonsalves luna pasá 90% di kasnan riba e isla a sufri daño a konsekuensia di e orkan Beryl.

Boneiru a skapa na wowo di angua. Tabata parse ku e mal tempu tabata bini derechito riba e isla, pero na último momento a desviá bai nort. Sinembargo tabatin hopi isla ku a eksperensiá e forsa di naturalesa. Union Island tabata un di nan. E isla tabata den e ruta di e mal tempu. Riba 1 di yüli habitantenan a mira hopi kas ku e tormenta a destruí.

Boluntarionan ta hiba produktonan di nesesidat di Boneiru pa Union Island. 

Mashin di awa ta duna awa fresku 

Boluntarionan na Boneiru a disidí pa yuda. A kolektá artíkulonan na Boneiru i a nabegá ku e barku Toroa direkshon di Union Island. E biahe a dura kuater dia. Un di e boluntarionan a laga Bonaire.nu sa: “Nos no a hiba solamente artíkulonan di nesesidat. Ku mashinnan di awa riba nos barku nos a traha awa di bebe limpi. Nos a pasa esaki den e tankinan riba e isla. Habitantenan di e isla a risibí e artíkulonan hopi agradesido”.