KRALENDIJK – James Finies i Davika Bissessar di Bonaire Human Rights ta reakshona riba deklarashonan resiente di Sr. Arthur Sealy i Sr. Willem Cecilia den un talk show popular, sugeriendo ku ta solamente e gobierno di Bonaire ta posishoná pa representá e interes di e pueblo di Bonaire. 

“Historia ta mustra ku moveshonan di siudadano a konfronta i reta strukturanan di poder, lucha pa derecho humano, i a kontribui na kambionan signifikativo den sosiedat, probando ku hende komun por kolektivamente influensia progreso. 

Bonaire Human Rights Organization (BHRO) e ultimo dekada ta brindando un plataforma pa e bosnan marginalisá di Boneiru. E krisis presente ku e pueblo di Bonaire ta enfrentando, redusí di 80% na un grupo minoritario di apenas 32% den 2024, ta kondusiendo na e imediato i rapido eliminashon di nan identidad, kultura, idioma, norma, i balornan.

E gobierno aktual, ku ta konsisti di e mesun lidernan politiko—Clark Abraham, Daisy Coffie, i Cyril Vrolijk—ku na 2017 a traishoná e Bonerianonan, dor di ignora nan rechazo di e status aktual, e voto -No, a permití e gobierno Hulandes pa aneksá i ankra nos den e Konstitushon Hulandes i permanentemente impone derechonan desigual. E gobierno di Boneiru ta wordu forsa pa asepta i implementá leinan ku ta traha na Den Haag I ku ta ilegalmente impone, violando ley internashonal.

Sr. Arthur Sealy, polítikamente komprometi, tabata e presidente di e komishon di referendum na 2004, ku a liderá e kampaña di referendum ku promésanan falsu ku nunka a wordu realisa, malinformando e pueblo di Boneiru i a poné e base pa e tragedia di 10-10-10. Adishonalmente, Sr. Willem Cecilia tambe politikamente kompremete, a hunga un rol signifikativo den e implementashon di 10-10-10 komo griffier, supervisando e proseso legal ku a pone nos den e struktura illegal aki.

Nos ke rekordá Sr Sealy I Sr Cecilia ku e deber primario di e gobierno ta: pa respetá, protehá, i kumpli ku e derecho di e pueblo. No pa traishoná o violá nan derechonan fundamental. Nos ta enfatisá ku e derecho inalienabel di autodeterminashon, establese bao di ley i tratadonan internashonal, ta pertenese na e pueblo—no na e gobierno di Bonaire o di Hulanda. E derecho aki a ser klaramente violá na momento ku na 2015, 66% di e poblashon a rechaza e estatus ilegal di aneksashon, un eskoho ratifiká pa e parlamento di Boneiru komo un desishon demokrátiko legítimo.

E falta di respet aki ta lanta serio preguntanan tokante di representashon i e autonomia di e pueblo di Boneiru. Konfiansa den lidernan polítiko a disminuí, resultando den un bahada di partisipashon di votadonan. E konsekuensianan di 10-10-10 ta mas kla awor: e representantenan di pueblo lokal ta subordiná bao di aproximadamente ocho entidadnan kontrolá pa Hulanda ku ta disidi. E partsipashon di votadonan a baha di mas di 80% prome ku 10-10-10 na aproximadamente 50% den e último elekshonan, esaki inkluyendo e Hulandes-Oropeo nan ku ta yenando Boneiru ku ta hanja derecho di votá despues di tres luna aki. E bahada aki ta subrayá e nesesidat di BHRO i sosiedat sivil pa lucha pa e derechonan i interes di e pueblo.

Nos ta urgi tur stakeholdersonan pa rekonosé e importansia di representashon inklusivo i pa sostene e esfuersonan di BHRO i sosiedat sivil den nan lucha pa hustisia, igualdad, i representashon hustu I legitimo pa e pueblo di Boneiru”.