Ginebra, Suiza – James Finies i Davika Bissessar di Bonaire Human Rights (BHRO) a partisipa resientemente na un konferensia internashonal na Sede di Nashonan Uni na Ginebra, organisá pa Baku Initiative Group. 

E evento a trese parlamentario, eksperto, politiko i sosiedat sivíl pa diskutí riba e impakto duradero di kolonialismo Franses i Hulandes, ku un enfoke riba hustisia, autodeterminashon, i derecho humano, segun e Tratado Internashonal di Derechonan Sivil i Politiko (ICCPR).

Un tema importante ku a wòrdu tresé dilanti na konferensia ta violashon di Hulanda di e tratado, ICCPR, spesialmente Artíkulo 1 i 2. Artíkulo 1 ta afirmá e derecho di tur pueblo pa autodeterminashon, inkluyendo kòntròl riba nan rekursonan i status polítiko. Artíkulo 2 ta ordená ku tur hende ku ta víktima di violashon di nan derechonan mester haña un solushon efektivo, inkluso kontra su mes ofisialnan.

Despues di nan partisipashon na eventonan na Nashonan Uni New York, e delegashon di BHRO a biaha pa Ginebra pa partisipá den e diskushonnan importante aki. Durante e konferensia, nan a someté un keho formal históriko na e Alto Komisionado di Derecho Humano di Nashonan Uní, denunsiando violashon di derechonan humano kontinuo dor di e gobièrno Hulandes na Bonaire. E keho ta pidi pa hustisia, responsabilisashon, i rèspèt pa derechonan humano i autodeterminashon di pueblo Boneriano.

Riba 23 di Oktober 2024, BHRO a partisipá tambe na un konferensia híbrido titulá “Empoderando Hobenan, Pueblo Indígena, i Estadonan Chiki Insular(SIDS) den Promové Derechonan Ambiental i Hustisia Klimatiko” na Domaine de la Pastorale na Ginebra. E evento, organisá pa e Geneva Centre for Human Rights Advancement and Global Dialogue, a enfoká riba derechonan ambiental di komunidadnan vulnerabel, partikularmente di pueblonan indígena i estadonan chiki insular afektá pa kambio klimátiko.

E delegashon di Bonaire a resaltá e intersektashon di hustisia klimátiko i kolonialismo, poniendo énfasis riba e menaza urgente pa e poblashon natívo di Bonaire debí na settlers-kolonisashon Hulandes. Nan a enfoká ku Bonerianonan natívo ta enfrenta un riesgo di desaparishon kultural i físiko hopi promé ku kambio klimátiko empereorá den un krisis mundial.

Inhustisia kolonial

Representante di teritorionan kolonisa, inkluyendo Guadeloupe, Martinique, Guiana Franses, Nueva Caledonia, Polynesia Franses, Sint Maarten, i Bonaire a partisipá, huntu ku diplomátikonan di Rusia, Suiza, Kazajistán, i otro paísnan. Ambos konferensia a resaltá e konekshon entre inhustisia kolonial históriko, derechonan humano, i e nesesidat di hustisia den e teritorionan ku a permanese kolonisa.

E evento aki ta un paso importante den e esfuerso kontinuo di BHRO pa defendé e derechonan di pueblo Boneriano riba esenario global.