KRALENDIJK – Aeropuerto Internashonal di Boneiru i Wardakosta resientemente a sera un konvenio pa mútuo sosten i kolaborashon na momentu di kalamidat riba laman. E konvenio aki ta di gran importansha pa aeropuerto, ya komo ku e aeropuerto mester kumpli ku regulashonnan di Organisashon Internashonal di Aviashon (International Civil Aviation Organization (ICAO), i e deseo di garantisá siguridat di e operashon.

Sigun e regulashon kada aeropuerto ta responsabel pa reakshoná riba situashonnan di kalamidat dentro di un radius di 1 kilometer rondó di e pista di aterisahe. Pa Aeropuerto Internashonal di Boneiru ta konta ku un parti di e responsabilidat ei ta ubiká riba laman, na unda Wardakosta ta e outoridat kompetente pa akshonnan di búskeda i reskate.

Banda di esei Aeropuerto Internashonal huntu ku Wardakosta i Cuijpers Consultancy, a formulá un plan di kalamidat nobo, pa asina registrá tur prosedura i aspekto di operashonnan di reskate. Serando e konvenio aki ku Wardakosta, e aeropuerto ta sigur di apoyo na momentu di operashonnan di búskeda i reskate riba laman den kaso di insidentenan ku avion, dentro di e radius di 1 kilometer rondó di e pista di aterisahe di isla Boneiru.