KRALENDIJK –  Ta parse ku gobièrnu di Boneiru ta pone stapnan importante pa drecha e logístika riba e isla invertiendo den un kran nobo pa hisa kònteiner. Esaki no mester oumentá solamente e efisiensia, pero tambe baha gastu di produktonan importá. Diputado Clark Abraham a duna un bista den e desaroyo aki.

“Nos ta hasiendo preparashonnan pa instalá un kran nobo ku ta hasi posibel pa stiwa i trasladá kònteinernan mas efisiente,” segun Abraham. Esaki ta krusial, prinsipalmente pasobra nos ta bringando pa rutanan di suministro nobo pa produktonan for di region, manera Trinidad i Tobago, Santo Domingo i Colombia.”

Mas kolegio ehekutivo tabatin bon idea 

Boneiru tin di haber pa basta tempu kaba ku preisnan di kuminda ku ta subiendo. Pa e kolegio ehekutivo aktual ainda no ta bon definí na kiko esaki ta debí. Un di e motibunan por ta e falta di un lei di kompetensia na Boneiru. Ya pa años diferente kolegio ehekutivo ta lucha ku e preisnan di kuminda ku ta subi na Boneiru. Èks-diputado Jolinda Craane tambe tabatin bon intenshon. Apesar di tur pensamentu positivo, tin ainda tiki ehèmpel konkreto ku berdaderamente ta bai hasi algu na e preisnan haltu. Semanalmente ta bini barkunan for di Venezuela, pero, kontrali na Kòrsou,  pa motibu di e lei aktual nan no ta pèrmití pa negoshá direktamente ku e konsumidó.

Boneiru ta muchu chikitu

Segun Abraham Boneiru ta enfrentando aktualmente retonan logístiko ku ta oumentá e gastu di produktonan importá. “E problema ta ku e demanda na Boneiru no ta grandi sufisiente pa atraé barkunan di kònteiner grandi. Ta p’esei nos ta dependé di barkunan regional mas chikitu, ku no por pone e kònteinernan tur biaha riba otro, loke ta subi e gastunan,” e ta splika.

Ainda no ta kla unda e kran mester bin para. Ta parse ku pa tanten no tin plannan konkreto ainda. Kapitan di haf Gunther Flanegin ta bisa lo siguiente al respekto: “Na e momento aki nos ta den fase preparatorio ainda. Nos a añadí e kran riba e presupuesto nobo. Pues mi no por duna plannan konkreto ainda. E diseño, ingenieria, gastu i lugá ta deskonosí ainda’”

A haña solushon 

E kran nobo mester trese kambio den e preisnan di kuminda ku ta sigui subi riba e isla. “Ku e invershon aki nos ta spera di no hasi solamente e transporte di produktonan mas efisiente, pero tambe oumentá e konkurensia i ku esaki tene e preisnan abou,” Abraham ta bisa.

Banda di e mehorashonnan logístiko e gobièrnu ta sondea tambe manera pa stimulá produkshon lokal. “Nos mester pensa tambe riba loke nos mes por produsí riba e isla pa tene e gastunan abou,” segun Abraham. El a mustra riba e opstákulonan aktual, manera gastu haltu di awa pa metanan di agrikultura. “Nos tin un instalashon di refiná awa, pero e transporte di e awa pa e áreanan di agrikultura ta hasi’é finalmente muchu karu. Nos mester atendé ku esaki pa stimulá agrikultura lokal. Kome nos propio produktonan mester haña prioridat riba proyektonan estétiko, manera drecha paisahe na hotèlnan,” Abraham ta konkluí.