KRALENDIJK– Ku Dia di Boneiru aserkando, Gobièrnu di Boneiru a kuminsá ku dekorashon di nos isla, komo preparashon pa e selebrashon tan importante akí. Pa engrandesé e sentimentu di orguyo nashonal ta bai pone bandera di Boneiru, trahá di material sostenibel, na diferente sitio inkluyendo e rotòndenan i Kaya Grandi.

E aña akí e dekorashonnan, huntu ku e lema “Boneiru limpi: Nos Deber, Nos Orguyo”, ta enfoká riba fortifikashon di nos sentido di orguyo pa nos isla. Na mes momentu e dekorashonnan ta duna un kaluroso bon biní na tur nos bishitantenan durante e dianan di selebrashon di Dia di Boneiru. 

Gobièrnu di Boneiru ta invitá tur habitante i bishitante pa disfrutá di e dekorashonnan i pa trata nos bandera di Boneiru ku e rèspèt nesesario, di manera ku tur hende por sinti e unidat ku e bandera ta simbolisá.