KRALENDIJK- Tin basta probabilidat ku Boneiru lo por keda sin sufisiente klapchi i otro tipo di vürwèrk pa kambio di aña, e aña aki. Esaki ta debí na e situashion difísil internashonalmente ku transporte di karga. 

AworBonaire riba djamars a papia ku vários importadó ku a konfirmá e informashon aki. Sí e vürwèrk yega mes, e lo ta hopi mas karu ku ta kustumber e añanan anterior pa motibu di gastunan di transporte di konteiner ku subi di forma drástiko. 

Pero aparte di gastu adishonal, tin peliger real ku no ta logra barka e konteinernan nan tempu. Manera AworBonaire ta komprondé dia 18 di novèmber ta un fecha krítiko. Si no logra saka konteiner for di China pa e dia ei, Boneiru lo keda ku apenas un Frakshon di e kantidat di vürwèrk ku ta yega e isla normalmente. 

Kòrsou

Si esaki mester sosodé, lo bai wak si por kumpra sierto kos via di Kòrsou. Sin embargo, esaki lo kondusí na preisnan aúm mas haltu. Esaki pa motibu ku na Kòrsou ta kobra un derecho di importashon (invoerheffing) di no ménos ku 71%, mientras ku na Boneiru esaki ta apenas 8%. 

Despues di dia 18 di e luna aki, lo por bisa ku mas seguridat kiko e situashon realmente lo ta.