KRALENDIJK – Ounke sierto komentario primeramente riba Medionan Sosial lo por hasi hende pensa diferente,  Boneiru realmente ta relativamente barata ora ta trata e preisnan pa kamber di hotèl. Esaki a sali na kla djaweps artarti for di un presentashon di direktor di Bonhata, Veroesjka de Windt, den un enkurentro pa presentá sifranan riba turismo di e promé dos kuartal di 2024.

Kompará ku e sobrá di e área Karibense, Bonaire ta kasi e isla mas barata ora ta bini na e preisnan di kamber. Esaki ta berdat ora kompará loke ta kobra na islanan hermana  Aruba i Kòrsou. Na Aruba, bishitantenan a paga un promedio di 517 dòler pa anochi i 279 dòler pa anochi na Kòrsou. Na Bonairu, e preis promedio di kamber den e mes periodo aki tabata 218 dòler pa anochi.

Riba e lista di preisnan di hotèl, e isla eksklusivo di Anguilla ta esun mas karo, ku un preis promedio di 1,953 dòler pa anochi. E úniko isla den un lista di 18 distino Karibense popular ku ta mas barata ku Bonaire, ta Trinidad, kaminda e preis promedio di kamber na e mes periodo aki tabata 215 dòler pa anochi.

Oportunidat pa Kresimentu

Segun De Windt, e komparashon akí ta indiká ku tin hopi espasio pa hotèlnan na  Boneiru subi nan preisdi kamber. “Si bishitantenan na nos islanan besino ta dispuesto pa paga hopi mas, dikon  nan lo no ta dispuesto pa gasta mas pa anochi na Bonaire tambe?” direktor di Bonhata a puntra.