Korte Komun di Hustisia ta organisá di nobo e asina yamá Carribean Summer Court. Esaki ta un stazje kòrtiku, intensivo pa studiantenan Karibense di lei universitario.

Caribbean Summer Court ta destiná spesialmente pa studiantenan di lei universitario ku resultadonan di estudio mas ku promedio, ku a pasa (parti di) nan hubentut riba e islanan.

E aña aki tin tres lugá pa stazje disponibel, kaminda e stazjèrnan por kuminsá simultáneamente. Durante e stazje e kandidatonan ta haña un bista kompleto den e trabou hudisial i ta ubiká nan na e departamentunan di Derechi Sivil, Derechi Penal i Derechi Atministrtativo. Na final di e stazje e stazjèrnan ta risibí un sertifikado di partisipashon.

Pa e edishon aki a selektá Aline Abdul di Universidat di Kòrsou, Jarelix Chirino di Universidat di Tilburg i Dayen Doran di Universidat di Leiden pa kore e stazje na Korte.

Riba nan promé dia di stazje djaluna 12 di ougustùs último Maroeska Scholte, vice presidente di Korte Komun di Hustisia a tuma huramentashon di  e studiantenan komo griffier. Alabes nan a risibí un ‘bef’ (loke entre otro magistrado, abogado- i wesnan ta bisti huntu ku nan trahe profeshonal) ku nan nòmber bòrdá riba dje.