KRALENDIJK- Un komparshon di preis ku a hasi bou di supermerkadonan lokal, e biaha aki ehekutá pa Fundashon Tienda pa Konsumidó Boneiru a mustra ku Caribe Nobo Supermarket ta esun mas barata di e isla. 

Aprel ta e promé luna den kua a kompará preisnan segun e lista básiko nobo. Na mart un registro di preis a tuma lugá, pero komo tabatin retonan den e manera di registrá preis, e no tabata responsabel pa publiká e resultadonan.

Un total di 175 produkto a wòrdu kompará i un kategoria nobo a wòrdu añadí, esta kuminda di bestia.  

Den e lista básiko a añadí mas produkto ku no ta pertenesé na un marka partikular, e produktonan en kuestion ta ser kompará segun nan peso i pakete. Ta registrá e produkto di mas barata ora ta kompará. Hopi biaha ta trata di produktonan ku no ta pertenesé na markanan konosí òf ta produktonan konosí bou  ‘huismerk’.

Bondigro

Bondigro Supermarket, ku anteriormente no ke a koperá ku e komparashon di preis ainda pa luna di aprel ainda no ta inkluí. Sinembargo, manra FTPKB ta bisa, Bondigro a indiká ku for di luna di mei si nan lo koperá ku e komparashon di preis mensual. 

Resultado

Caribe nobo a sali mas barata ku 21 produkto den e lista base. Tabatin un diferensia di preis di un total di 93% mas barata ku e resto di supermerkadonan, i un kantidat di 60.95 dòler ku e kliente por spar dor di kumpra e produktonan en kuestion for di nan.

E di dos supermerkado mas barata ta Wing Cheung na Antriol. Nan a skor mas barata ku 18 produkto, ku en total 112 produkto for di e lista di base. Tabatin un diferensia di preis di un total di 67% mas barata ku e resto di supermerkado. Klientenan por spar un  kantidat di 61.07 dòler spar dor di kumpra e produktonan en kuestion for di nan.

Top Supermarket na Playa a sali komo e terser mas barata. Nan a skor mas barata ku un total di 14 produkto for di un total di 97 produkto for di e lista di base. Kumprando na Top, klientenan por 35.23 dòler kompará ku e promedio di otro supermerkadonan.