KRALENDIJK- E aerolínea Corendon lo kuminsá operá buelonan for di novèmber 2024 entre Amsterdam i Boneiru.
E aerolínea ta komprometé ku un konekshon direkto for di Boneiru pa Amsterdam, kaminda ku e buelo for di Amsterdam pa Boneiru lo pasa via Kòrsou. Inisialmente, Corendon lo bula dos biaha pa siman pa Boneiru.

Norman Serphos ta e portabós di Corendon i a komentá lo siguiente: “Nos lo bula ku e avión mas moderno, e Airbus A350. Esaki ta un avión mas moderno, efisiente i mas silensioso ku loke por ehèmpel KLM ta usando. Pasaheronan por spera kalidat for di nos”. E promé buelo ta di skèjdel pa djasabra 3 di novèmber, ounke mester optené outorisashon ofisal ainda. E buelo aki lo bai for di Amsterdam, via Kòrsou pa Boneiru.

E kompania ta fuerte den ofresé pasashi kombiná ku hotèl. P’esei tambe nan por kompetí ku TUI ku tambe ta bula pa Boneiru. E tikèt di bai i bini mas barata di Corendon sin hotel awor ta kosta 758 euro. Via e sistema di kompra online por verifiká riba kua dianan por bula.

Sin hotèl propio

Riba e pregunta si Corendon, meskos ku TUI, lo konstruí nan propio hotèl na Boneiru, e portabós a bisa lo siguiente: “Nos tin hopi hotèl ku kua nos ta traha na e Boneiru. A korto plaso nos no tin plan pa konstruí nos propio hotèl na Boneiru”.
E siman ku ta bini gerensia di Corendon lo bishitá Boneiru pa un konferensia di prensa ofisial. For di e dia ei klientenan por kuminsá riservá nan buelo serka e kompania.