ORANJESTAD – Djadumingu mardugá algu prome ku 3 ‘or sentral di polis na Aruba a risibí un notisia di un aksidente di tráfiko hopi serio.

Un Nissan Skyline shinishi tabata envolví den un dalmentu kontra di un kas den un bògt serka di Tierra del Sol. Ora ku a yega na luga di aksidente, a bin topa e outo kompletamente destruí banda di kaminda.

Un hende muhé hóben ku tabata sinta komo pasahero den e outo no tabata reakshoná mas i aki a yama ambulans ku urgensia. E ambulans a yega lihá na e sitio, pero personal médiko no por a hasi nada mas pa e hóben. Un aspekto ferfelu ta, ku identidad di e víktima ainda no ta konosí.

E shofùr di e Skyline a wòrdu detené pa investigashon. Spesialista di tráfiko, polis tékniko i un dòkter forénsiko tabata presente pa investigá e situashon.

Kuerpo Polisial Aruba ta hasi un yamada na famia òf konosí k uta sinti falta di un hende muhé hóben na kas pa por fabor tuma kontakto ku sentral di polis.