KRALENDIJK – Dialuna anochi, agentenan polisial mester a intervení dos biaha pa e mesun hende muhé ku tabata basta fuma. 

Banda di 8 or pa djanochi, e muhé di 39 aña ku inisialnan I.B. a wòrdu detené na Kaminda Djabou pa manehá bou di influensia despues di un aksidente. Un tèst di suplá a mustra ku I.B. tabatin mas alkohòl den su kurpa, ku lei ta permití. Despues ku a hiba I.B. warda, a disidí di kita su reibeweis for di dje. Despues di esaki nan a laga I.B. bai. 

Mas lat den anochi, banda di 11 ‘or polis a haña un yamada pa un hende muhé ku mester a keda pegá den un porta di heru na un kompleho di apartement. Pa gran sorpresa di e agentenan polisial, tabata trata di mesun I.B. ku a wòrdu detené mas trempan anochi pa korementu bou di influensia. 

I.B. tabata ta asina mal pegá den e porta di kurá, ku bomberonan mester a bin pa zag saka e señora for di su posishon delikado. Ku un pida di e porta ainda pegá na su pia, mester a hiba I.B. hospital pa tratamentu médiko na su heridanan.